真歡喜得到HOT Open Summit的補助金參與這改佇肯亞舉行的State of the Map 2024，會當去現場發表我的演講主題。毋過真可惜去的時陣破病，倒佇眠床休養，無法度有真濟佮參與者的互動。

(圖片：Arnalie翕相)

大會第一工倒佇眠床規工，第二工才有法度去會場。佇大學內底的高塔建築Nairubi Tower的會議中心舉行，算是真四序的場地。這是我第三改參與State of the Map，第二改現場參與。可能因為去非洲的路途較遠，整體規模較細，毋過會當面對面交關是真寶貴的體驗。家己有拄著一个編輯器開發者，伊共我講伊熟似yellowsoer，佮伊反應Go Map!!的問題。𪜶太太是台灣人，所以一直佮𪜶翁仔某開講。𪜶講欲來台灣一逝，到時欲來聚會。

我家己的演講部份，分享地址匯入工課，順紲講台灣社群最近咧無閒啥。有人回應問以後資料更新的部份按怎進行，我老實講有拄著閣討論，若是有發現問題就修正，照OpenStreetMap的規則進行。

別人的演講部份，有請頂港有名聲的Map Kibera 的人來講。Map Kibera是足早期的 OpenStreetMap 專案，算是 HOT 成形前的集體行動。Kibera 是 Nairubi 的散食人蹛的所在，所以商業地圖是無興趣來記錄的所在。15年了後佇奈洛比的State of the Map回顧，真有意義。當年愛有特定的管道有GPS機器才會當畫GPS跤跡，如今工具愈來愈濟，毋過抑是愛有人參與才有意義。

我猶閣有聽Strava的人講𪜶按怎用𪜶收的GPS跤跡來做分析，補充欠缺的路。日本人古橋大地講有關智慧城市的主題。

▲ Strava 議程講𪜶利用GPS跤跡來分析。

真歹勢身體無好，愛濟濟歇睏，無啥物精神會當做義工。明年Wikimania嘛佇肯亞舉行，我唷應該嘛是奈洛比大學的仝場地舉行，小可較濟人參與，毋知敢有機會閣來？