O OpenStreetMap fornece datos de mapas abertos para miles de sitios web, aplicacións móbiles e dispositivos. O OpenStreetMap está construído por unha comunidade de persoas coma ti que contribúen e manteñen datos cartográficos sobre estradas, sendeiros, cafetarías, estacións de tren e moitos máis lugares de todo o mundo.

Aprende máis sobre o OpenStreetMap e comeza a cartografar! Podes ler máis no blog do OpenStreetMap e subscríbete a weeklyOSM. Atopa outros cartógrafos na túa comunidade OSM local. Apoia o proxecto uníndote á Fundación OSM e facendo unha doazón.

Licenzas do OpenStreetMap

O OpenStreetMap son datos abertos, licenciados baixo a licenza Open Data Commons Open Database (ODbL) pola Fundación OpenStreetMap (OSMF). En resumo:

Es libre de copiar, distribuír, transmitir e adaptar os nosos datos, na medida en que acredites o OpenStreetMap e mailos seus colaboradores. Se alteras ou constrúes a partir dos nosos datos, terás que distribuír o resultado baixo a mesma licenza. O código legal completo en Open Data Commons explica os teus dereitos e responsabilidades.

A nosa documentación está licenciada baixo a licenza Creative Commons recoñecemento compartir igual 2.0 (CC BY-SA 2.0).

Le máis sobre o uso dos nosos datos na páxina de licenza da OSMF.

De que xeito acreditar o OpenStreetMap

Aló onde uses datos do OpenStreetMap, debes facer dúas cousas:

• Proporciona crédito ao OpenStreetMap mostrando o noso aviso de recoñecemento.
• Aclara que os datos están dispoñibles baixo a licenza Open Database.

Para o aviso de recoñecemento, temos diferentes requisitos sobre como se debe mostrar isto, dependendo de como esteas a usar os nosos datos. Por exemplo, aplícanse diferentes regras sobre como mostrar o aviso de recoñecemento dependendo de se creaches un mapa navegable, un mapa impreso ou unha imaxe estática. Podes atopar máis detalles na sección directrices de recoñecemento dos requisitos de licenza.

En xeral, para deixares claro que os datos están dispoñibles baixo a licenza Open Database, podes deixar unha ligazón a esta páxina de dereitos de autoría. Se estás a distribuír no OSM en forma de datos, nomea e liga directamente ás licenzas. En medios nos que non é posible incluír ligazóns (por exemplo, obras impresas), inclúe o enderezo URL completo na páxina; por exemplo, https://www.openstreetmap.org/copyright.

Neste exemplo, os créditos aparecen no recuncho do mapa:

Violación dos dereitos de autoría

Lembramos ós colaboradores do OSM que nunca engadan datos de fontes con dereitos de autoría (por exemplo, o Google Maps ou mapas impresos) sen o permiso explícito dos posuidores deses dereitos.

Se cres que se engadiu de forma inadecuada material protexido por dereitos de autoría á base de datos do OpenStreetMap ou a este sitio, consulta o noso procedemento de retirada ou diríxete directamente á nosa páxina de presentación en liña.

Marcas rexistradas

O OpenStreetMap, o logotipo da lupa e State of the Map son marcas rexistradas da Fundación OpenStreetMap. Se tes dúbidas sobre o teu uso das marcas, consulta a nosa política de marcas rexistradas.

Servizos adicionais

Malia que os datos do OpenStreetMap son libres, non podemos ofrecer unha API de mapas ou mosaicos de mapas gratuítos para terceiros. Consulta a nosa política de uso da API, a nosa política de uso de mosaicos e a nosa política de uso de Nominatim.

Os nosos colaboradores

Os nosos colaboradores son milleiros de persoas. Tamén incluímos datos baixo licenzas abertas de axencias nacionais de cartografía e outras fontes, entre elas:

• Austria: Contén datos de Stadt Wien (baixo a licenza CC BY), o estado Vorarlberg e a rexión do Tirol (baixo a licenza CC BY AT con emendas).
• Australia: Incorpora ou foi desenvolvida usando fronteiras adminitrativas © Geoscape Australia licenciado pola Commonwealth de Australia baixo a licenza Creative Commons recoñecemento 4.0 international (CC BY 4.0).
• Canadá: Contén datos de GeoBase®, GeoGratis (© Department of Natural Resources Canada), CanVec (© Department of Natural Resources Canada) e StatCan (Geography Division, Statistics Canada).
• Chequia: Contén datos da administración estatal de topografía e catastro, licenciados baixo a licenza Creative Commons recoñecemento 4.0 international (CC BY 4.0)
• Finlandia: Contén datos da base de datos topográfica do servizo nacional cartográfico de Finlandia e outros conxuntos de datos, baixo a licenza NLSFI.
• Francia: Contén datos procedentes da Direction Générale des Impôts.
• Croacia: Contén datos da administración xeodésica estatal de Croacia e o portal nacional de datos libres (información pública de Croacia).
• Países Baixos: Contén datos © AND, 2007 (www.and.com)
• Nova Zelandia: Contén datos procedentes do servizo de datos LINZ e licenciados para a súa reutilización baixo a CC BY 4.0.
• Serbia: Contén datos da autoridade xeodésica serbia e o portal nacional de datos libres (información pública de Serbia), 2018.
• Eslovenia: Contén datos da autoridade topográfica e cartográfica e o ministerio de agricultura, silvicultura e alimentación (información pública de Eslovenia).
• España: Contén datos procedentes do instituto xeográfico nacional de España (IGN) e o sistema cartográfico nacional (SCNE), licenciados para a súa reutilización baixo a CC BY 4.0.
• Suráfrica: Contén datos procedentes da Dirección Xeral: Información Xeoespacial Nacional, dereitos de autoría reservados ao estado.
• Reino Unido: Contén datos da Ordnance Survey © Dereitos de autoría e da base de datos da Coroa 2010-2023.

Para obter máis detalles sobre estas e outras fontes que se utilizaron para axudar a mellorar o OpenStreetMap, consulta a páxina de colaboradores no wiki do OpenStreetMap.

A inclusión de datos no OpenStreetMap non implica que a persoa que orixinalmente forneceu os datos apoie o OpenStreetMap, dea calquera garantía ou acepte calquera responsabilidade.